মুখ্য পৃষ্ঠা
06/04/25
14:50
এই জীৱন কাম্য নহয়
অশ্ৰুৰ নদী মই হ'ব নোৱাৰো ,
বৈ যাব নোৱাৰো দুগালেৰে কোনোদিন !
বিষাদ নগৰীত সজাব নোৱাৰো অট্ৰালিকা ,
নোৱাৰো জ্বলাব তাত তেজৰ শলিতা !
পাৰা যদি আতৰি যোৱা সময় ,
আতৰি যোৱা তুমিও বন্ধু ,
আতৰি যোৱা মোৰ প্ৰাণৰ প্ৰতিমা !
শুভ্ৰ সুবাসী শেৱালী হৈ ,
মোৰ পদুলিত ফুলি নুঠিবা কোনোদিন !
মই যে সুবাসহীন ৰাঙলী মদাৰ ,
গচকত মৰহি যোৱাৰ প্ৰতিশ্ৰুতি দিয়াৰ !
নিসংগতাৰ দ্বিপত মই হেৰায় যোৱা নাৱীক ,
সমাধিত পৰি ৰোৱা এটুকুৰা কাঠ...
তেজে তেজে বিয়পি আছে মোৰ ,
জীৱন নদীৰ প্ৰতিটো ঢ়ৌ !
আলিংগন মোৰ মমতাৰ বিননিত ,
কোনো অঘৰী আত্মাৰ সৈতে ,
শ্মশানৰ মাজত উজাগৰি ৰাতিত !
অ' সময় ,
তুমি পাৰ হৈ যোৱা দেও দি !
মই নহয় জীৱনৰ প্ৰেমিক ,
নহয় মই বিলাসিতাৰ ৰাজকুমাৰ !
© ৰাজু কলিতা
26/08/14
